दिवळे सरपंचांचे सदस्यत्व रद्द; जात पडताळणी प्रमाणपत्र न सादर केल्याने जिल्हाधिकाऱ्यांचा आदेश
कापूरव्होळ : भोर तालुक्यातील दिवळे गावच्या सरपंच विद्या गोविंद पांगारे यांनी त्यांचे जात वैधता पडताळणी प्रमाणपत्र वेळेत सादर न केल्याने त्यांचे सदस्यत्व रद्द झाले असुन भुतलक्षी प्रभावाने ११ जुलै २०२४ पासुन त्यांना सदस्य पदावर राहण्यास अपात्र ठरवण्यात आल्याचा निकाल जिल्हाधिकारी पुणे यांनी दिला आहे. या मुळे त्यांचे सदस्यत्वपदा बरोबर सरपंचपदही गेले आहे.
दिवळे येथील ग्रामस्थ सोपान बबन बाठे यांनी या बाबत जिल्हाधिकारी यांना ऑगस्ट २०२४ मध्ये तक्रार अर्ज केला होता. त्यामध्ये दिवळे ग्रामपंचायतीच्या सार्वत्रिक निवडणुकीत सन २०२१ मध्ये विद्या पांगारे यांनी प्रभाग क्रमांक २ मध्ये नागरीकांचा मागास प्रवर्ग स्त्री या आरक्षणा मधुन निवडणुकीसाठी कुणबी प्रमाणपत्राच्या अधारे अर्ज दाखल केला होता व त्या बिनविरोध निवडुण आल्या होत्या. परंतु निवडुण आल्यानंतर एक वर्षात त्यांनी जात पडताळणी प्रमाणपत्र निवडणुक निर्णय अधिकारी यांच्याकडे सादर करणे अपेक्षीत होते. ते त्यांनी सादर केले नाही. या बाबत चौकशी करुन त्यांचे सदस्यत्व रद्द करण्याची मागणी बाठे यांनी केली होती.
या अर्जावर जिल्हाधिकारी यांनी सर्व संबधीतांना नोटीस बजावुन सुनावणी निश्चित करुन म्हणणे मांडण्यासाठी पुरेशी संधी देण्यात आल्यानंतर ग्रामपंचायत अधिनियम १९५९ चे कलम १६(२) अन्वये जिल्हाधिकारी यांनी २३ सप्टेंबर रोजी निकालाचा आदेश देत तक्रारदार सोपान बाठे यांचा अर्ज मान्य करत सदस्या, सरपंच विद्या गोविंद पांगारे यांना ग्रामपंचायत दिवळे येथील ग्रामपंचायत सदस्यपदी राहण्यास भुतलक्षी प्रभावाने जात वैधता प्रमाणपत्र सादर करण्याची मुदत संपल्यापासुन म्हणजेच ११ जुलै २०२४ पासुन अपात्र ठरविण्यात येत असल्याचा निकाल दिला आहे.
या निकालामुळे विद्या पांगारे यांचे सदस्यत्वासह सरपंचपद देखील रद्द झाले आहे. या संदर्भात संपर्क साधला असता विद्या पांगारे यांनी प्रतिक्रिया देताना सांगितले की, “जिल्हाधिकारी यांच्या आदेशाविरोधात मी अपील करणार असून त्याबाबत वकिलांशी चर्चा सुरू आहे.” या निर्णयामुळे दिवळे ग्रामपंचायतीत पुढील राजकीय घडामोडींना वेग येण्याची शक्यता वर्तवली जात आहे.
