जनतेच्या समस्या ऐकायला प्रशासन सज्ज; प्रांताधिकारी डॉ. खरात यांच्या मार्गदर्शनाखाली भोरमध्ये आजपासून ७ दिवसांचा महसूल सप्ताह

भोर : राज्य शासनाच्या महसूल विभागाच्या आदेशानुसार १ ऑगस्ट हा महसूल दिन साजरा होत असून, त्यानिमित्ताने १ ते ७ ऑगस्ट २०२५ या कालावधीत महसूल सप्ताह साजरा केला जाणार आहे. या कार्यक्रमात नागरिकांच्या विविध समस्या ऐकून त्यावर तात्काळ अंमलबजावणी करण्यावर भर दिला जाणार असल्याची माहिती भोरचे उपविभागीय अधिकारी डॉ. विकास खरात यांनी दिली.

यावेळी तहसीलदार राजेंद्र नजन, नायब तहसीलदार डॉ. अरुण कदम, वैशाली घोरपडे, संजय गांधी योजनेचे नायब तहसीलदार प्रतिभा खाडे, आदेश दुनाके तसेच सर्व मंडळ अधिकारी उपस्थित होते. हा महसूल सप्ताह म्हणजे प्रशासन आणि जनतेमधील संवाद वाढवण्याचा एक प्रभावी माध्यम असून नागरिकांनी या उपक्रमात सहभागी होऊन आपल्या समस्या मांडाव्यात, असे आवाहन प्रांताधिकारी डॉ. खरात यांनी यावेळी केले.

“महसूल सप्ताहात दररोज विशिष्ट उपक्रम राबवले जाणार आहेत. तसेच, या सप्ताहात सर्व शासकीय विभागांचे अधिकारी, आमदार, माजी आमदार, पंचायत समिती सदस्य, जिल्हा परिषद सदस्य, सरपंच, उपसरपंच, विविध सहकारी संस्थांचे चेअरमन व पदाधिकारी यांना आमंत्रित करण्यात येणार असल्याचे डॉ. खरात यांनी सांगितले.

तहसीलदार राजेंद्र नजन यांनी महसूल सप्ताहातील दिनांकनिहाय उपक्रमाची माहिती दिली.
पहिला दिवस – महसूल संवर्गातील उत्कृष्ट अधिकारी व कर्मचाऱ्यांना पुरस्कार देणे तसेच विविध योजनांचे लाभार्थ्यांना प्रमाणपत्रांचे वाटप.
दुसरा दिवस – सन २०११ पूर्वी शासकीय जमिनीवर राहणाऱ्या पात्र कुटुंबांना अधिकृत पट्टे वितरण.
तिसरा दिवस – गावांमधील पाणंद/शिवरस्त्यांची मोजणी व रस्त्यांच्या दुतर्फा वृक्षारोपण उपक्रम.
चौथा दिवस – मंडलनिहाय छत्रपती शिवाजी महाराज महाराजस्व अभियान राबवून जनतेच्या तक्रारींवर त्वरित कारवाई.
पाचवा दिवस – विशेष सहाय्य योजना लाभार्थ्यांना प्रत्यक्ष घरभेटी देवून DBT द्वारे अनुदानाचे वितरण.
सहावा दिवस – शासकीय जमिनीवरील अतिक्रमण निष्कासन व शर्तभंग झालेल्या जमिनींवर कायदेशीर निर्णय.
सातवा दिवस – M-Sand धोरण आणि नवीन कार्यप्रणाली (SOP) यांची अंमलबजावणी करून महसूल सप्ताहाची सांगता.