तृतीयपंथी नेतृत्वातून शिक्षणाला उजाळा; डॉ. आम्रपाली मोहिते यांच्या हस्ते विद्यार्थ्यांना शैक्षणिक साहित्य वाटप
सारोळा : राजर्षी छत्रपती शाहू महाराज यांच्या १५१व्या जयंतीनिमित्त जिल्हा परिषद प्राथमिक शाळा, न्हावी येथे गुरुवारी(दि. २६ जून) एक आगळावेगळा आणि प्रेरणादायी उपक्रम राबवण्यात आला. समाजसेविका व तृतीयपंथी सामाजिक कार्यकर्त्या डॉ. आम्रपाली मोहिते (सप्तरंगी आई) यांच्या हस्ते ५० विद्यार्थ्यांना दप्तर व शैक्षणिक साहित्याचे वाटप करण्यात आले.
कार्यक्रमाची सुरुवात राजर्षी शाहू महाराजांच्या प्रतिमेला पुष्पहार अर्पण करून करण्यात आली. सकाळच्या सौम्य सूर्यप्रकाशात, न्हावी शाळेच्या प्रांगणात समतेच्या विचारांनी भारलेले वातावरण जाणवत होते. शाहू महाराजांच्या सामाजिक समतेच्या व शिक्षणविषयक कार्याची उजळणी करत, या उपक्रमाच्या माध्यमातून ‘सर्वांसाठी समान संधी’ या त्यांच्या मूल्यमंत्राची प्रत्यक्षात अंमलबजावणी होताना दिसली.
डॉ. आम्रपाली मोहिते या नेहमीच वंचित, दुर्बल व उपेक्षित घटकांसाठी कार्यरत असून, त्यांनी विद्यार्थ्यांना दप्तर, वह्या, पेन, पेन्सिल, कंपास इत्यादी साहित्याचे वाटप केले. हा क्षण विद्यार्थ्यांसाठी केवळ वस्तू मिळण्याचा नव्हता, तर शिक्षणाच्या प्रवासाला नवे बळ मिळण्याचा होता. प्रत्येक विद्यार्थ्याच्या डोळ्यात आशेचा नवा प्रकाश दिसत होता.
आपल्या प्रभावी भाषणात डॉ. मोहिते म्हणाल्या, “शिक्षण हेच खरे समतेचे शस्त्र आहे. शाहू महाराजांचा सामाजिक न्यायाचा लढा आजही प्रेरणादायी आहे.” त्यांच्या शब्दांनी उपस्थितांच्या मनात नवचैतन्य निर्माण केले. या कार्यक्रमात शाळा व्यवस्थापन समितीचे सदस्य अनिल सोनवणे यांनी डॉ. मोहिते यांच्या कार्याची विशेष स्तुती केली. ग्रामीण भागातील विद्यार्थ्यांसाठी दिलेले साहित्य त्यांच्या शिक्षण प्रवासातील अडथळे दूर करणारे आणि त्यांना आत्मविश्वास देणारे ठरले.
कार्यक्रमाच्या यशस्वी आयोजनासाठी अनेक मान्यवर उपस्थित होते. यामध्ये नंदू सोनवणे, भानुदास चव्हाण, नवनाथ सोनवणे, किशोर सोनवणे, अनिकेत भोसले, शरद सोनवणे, गणेश कोंडे, रजनीकांत सोनवणे, अविनाश भोसले, अमोल शिवणकर, अभिषेक भोसले, मच्छिंद्र गव्हाणे, सोनाली सोनवणे, सोनाली बोन्द्रे, उर्मिला भुतकर, गीतांजली पाटील यांचा समावेश होता.
कार्यक्रमाचे प्रास्ताविक संदिप मोरे यांनी केले. सूत्रसंचालन अनिल चाचर यांनी तर आभार प्रदर्शन रुपाली पिसाळ यांनी केले. हा उपक्रम केवळ शैक्षणिक साहित्याचे वाटप नव्हे, तर शाहू महाराजांच्या विचारांचा एक सजीव पुरावा होता. त्यांच्या स्मृतींना साक्ष ठेवून, न्हावी शाळेतील विद्यार्थ्यांच्या आयुष्यात या उपक्रमाने आशेचा नवा किरण फुलवला.
