पुणे आरटीओकडून १५ दिवसांत १२९ बसेसवर कारवाई

पुणे : गेल्या १५ दिवसांत पुणे प्रादेशिक परिवहन कार्यालयाने (आरटीओ) १२९ खासगी बस-मालक आणि त्यांच्या चालकांवर कारवाई केली असून, दिवाळीच्या काळात शहराबाहेर जाणाऱ्या प्रवाशांकडून जादा भाडे आकारताना पकडले गेले आहेत. सणासुदीच्या काळात प्रवाशांकडून मनमानी भाडे आकारणाऱ्या खासगी बसमालक आणि चालकांवर कारवाई करण्यासाठी पुणे आरटीओने विशेष पथके स्थापन केली होती.

पुणे आरटीओने दिलेल्या माहितीनुसार, आरटीओ पथकांनी सणासुदीच्या काळात प्रवासी वाहतूक करणाऱ्या खासगी टुरिस्ट बसेस आणि इतर वाहनांची तपासणी केली आणि अशी १२९ वाहने प्रवाशांकडून जादा भाडे आकारल्याबद्दल दोषी आढळली. आरटीओने या वाहनांवर दंडात्मक कारवाई केली आणि १ ते १६ नोव्हेंबर दरम्यान चालकांकडून ८,६१,६०० रुपये दंड वसूल केला. पुणे आरटीओने मनमानी भाडे आकारणाऱ्या खासगी वाहनांची तक्रार करण्यासाठी प्रवाशांना व्हाट्सॲप क्रमांक दिला असताना, ३७ प्रवाशांनी अशी नोंद केली. गेल्या १५ दिवसांतील तक्रारीवरून आरटीओकडून संबंधित बसचालकांवर कडक कारवाई करण्यात आली आहे.

खासगी बसचालकांनी दिवाळीत शहराबाहेर जाणाऱ्या प्रवाशांकडून मनमानी भाडे आकारू नये, यासाठी विशेष मोहीम हाती घेण्यात आली होती. त्यानुसार या मोहिमेत नियमांचे उल्लंघन करणाऱ्या वाहनांवर कारवाई करण्यात आली आहे. मोटार वाहन कायद्या नुसार खासगी बसचालकांनी प्रवाशांकडून जादा भाडे आकारू नयेत यासाठी ही मोहीम यापुढे सुरूच राहील. -संजीव भोर(पुणे प्रादेशिक परिवहन अधिकारी)

८२७५३३०१०१ या व्हॉट्सॲप क्रमांकावर अशा कोणत्याही समस्येबाबत प्रवाशांनी तक्रार करावी. त्यांनी त्यांचे नाव, मोबाईल क्रमांक, मार्ग, बस क्रमांक, बसचा प्रकार, बसचा फोटो आणि तिकिटाचा फोटो यासह तपशील पाठवावा. पुणे जिल्हा खाजगी पर्यटक बस असोसिएशनचे सचिव केदार म्हरगजे यांनी आरटीओच्या कारवाईला आमचा पाठिंबा असल्याचे सांगितले.