खेड-शिवापूर टोलनाक्याजवळ तब्बल ९३ लाखांचा विदेशी दारूचा साठा जप्त; राज्य उत्पादन शुल्क विभागाची मोठी कारवाई
खेड शिवापूर : पुणे – सातारा महामार्गावरील खेडशिवापूर टोलनाक्याजवळ फक्त गोवा राज्यात विक्री करण्यासाठी परवानगी असलेल्या विदेशी दारूचा तब्बल ९३ लाख ५९ हजार रुपयांचा मुद्देमाल राज्य उत्पादन शुल्क विभागाच्या पथकाने जप्त केला. विपुल देविलाल नट (वय ३२ रा. बांसवाडा, राजस्थान) असे अटक केलेल्या आरोपीचे नाव आहे. राज्य उत्पादन शुल्क विभागाने दिलेल्या माहितीनुसार, नाताळ व नववर्षाच्या पार्श्वभूमीवर महाराष्ट्रात गोवानिर्मीत विदेशी मद्याची विक्री करण्यासाठी गोव्यातून बंगळुरू-मुंबई या राष्ट्रीय महामार्गावरुन विक्रीसाठी एक आयशर कंपनीचा सहा चाकी टॅम्पो येणार असल्याची माहिती मिळाली होती.
मिळालेल्या माहितीनुसार, मंगळवारी (ता. १९ डिसेंबर) पहाटेच्या वेळी ३ वाजता खेड शिवापूर टोलनाक्यावर पथकाने सापळा रचला व संशयास्पद ट्रक अडवला. ट्रकची तपासणी केली असता ट्रकचालकाने वाहनामध्ये औषधे आहेत, असे सांगून त्याबाबतची औषधांची बिल, टॅक्स इन्व्हाईस अशी कागदपत्रे दाखविली. कंटेनरचे कुलूप उघडून पाहिले असता कंटेनरमध्ये एकुण ९५० बॉक्समध्ये मद्याने भरलेल्या एकुण ४५ हजार ६०० सिलबंद बाटल्यांचा साठा मिळून आला. त्याने औषधांच्या नावाखाली गोवा राज्यात निर्मीत विदेशी मद्याची वाहतूक महाराष्ट्र राज्यात विक्री करण्याचे उद्देशाने करुन फसवणूक केल्यामुळे त्याच्याविरुद्ध गुन्हा नोंद करण्यात आला.
सदरची कारवाई राज्य उत्पादन शुल्क, विभागीय भरारी पथकाचे निरीक्षक नंदकुमार जाधव, दुय्यम निरीक्षक ए. सी. फडतरे, तसेच अमर कांबळे, अहमद शेख, एस. एस. पोंधे, अनिल थोरात, पी.टी. कदम भरत नेमाडे व अमोल दळवी यांनी सहभाग घेतला असून, गुन्हयाचा पुढील तपास विभागीय भरारी पथकाचे दु, निरीक्षक ए. बी. पाटील हे करत आहे.
