बंगळुरु ते शिरवळ रक्तरंजित प्रवास! पत्नीचा खून करुन मृतदेह बॅगेत भरला.. तणावाखाली औषध पिला.. मदतीसाठी एकाने रुग्णालयात आणला.. अन् राकेश शिरवळ पोलिसांना सापडला

शिरवळ : बंगळुरुत आपल्या पत्नीचा खून करुन तीचा मृतदेह बॅगेत भरून घराला कुलूप लावून मुंबईचे दिशेने पळून जाणाऱ्या आरोपीला पकडण्यात पोलिसांना यश आले आहे. सातारा जिल्ह्यातील शिरवळ(ता. खंडाळा) पोलीसांच्या सतर्कतेमुळे आरोपीला अटक करण्यात आली आहे. राकेश राजेंद्र खेडेकर (वय ३५ वर्ष, रा. जोगेश्वरी, मुंबई) असे आरोपीचे नाव आहे. 

काय आहे संपूर्ण प्रकरण?

मिळालेल्या माहितीनुसार, राकेश खेडेकर हा मुंबई येथून बंगळुरु येथे दि. २५ फेब्रुवारी रोजी आपली पत्नी गौरी(वय ३३ वर्ष) हिच्यासह बंगळुरु येथील बनारगट्टा तेजस्विनी नगर येथे कंपनीच्या कामासाठी राहण्यास गेला होता. राकेश हा कंपनीत प्रोजेक्ट मॅनेजर पदावर असून वर्क फ्रॉम होम करीत होता, तर त्याची पत्नी गौरी जॉब शोधत होती. 

पत्नी गौरीने पुन्हा मुंबईला जाण्याचा धरला हट्ट

बुधवारी (दि. २६ मार्च) रात्री राकेशकडे पत्नी गौरीने पुन्हा मुंबईला जाण्याचा आग्रह धरला. या कारणाने त्यांचे वाद होऊन पत्नी गौरी घरातील भांडी आपटू लागली. तेव्हा पती राकेशने आपण आता राहत असलेल्या रुमचे डिपॉझिट भरलेले आहे आपण जर रुम सोडली तर डिपॉझिटचे पैसे मिळणार नाहीत. तसेच, येथे येण्यासाठी आधीच खूप खर्च झाला आहे, असे तिला समजावत होता. 

मुंबईला जाण्यावरून दोंघांमध्ये झालेल्या टोकाचा वादातून खून

तरीही गौरी त्याचे ऐकत नसल्यामुळे त्यांच्यात याच कारणावरुन टोकाचा वाद झाला. अखेर, पत्नी गौरीने घरातील चाकू घेऊन राकेशला मारण्याची भीती दाखवली, त्याचा राग राकेशला आल्याने राकेशने तिच्या हातातील चाकू घेऊन पत्नी गौरीचे मानेवर, गळ्यावर आणि पाठीवर चाकूने वार केले. त्यामध्ये, गौरीने जीव सोडला.

राकेशने गौरीचा मृतदेह बॅग मध्ये भरून घरात ठेवला 

गौरी जखमी अवस्थेत घराचे लॉबीमध्ये निपचित पडली, ती मयत झाल्याची खात्री राकेशला झाली. त्यानंतर राकेशने घरातील मोठी बॅग रिकामी करून त्यामध्ये पत्नी गौरीचे शव ठेवून बॅगेची चेन लावली व ती बॅग घराच्या बाथरूम बाहेर नेऊन ठेवली. 

खून केल्यानंतर स्वतःच्या कारने राकेश मुंबईकडे रवाना

गुरुवारी (२७ मार्च) रात्री १२ वाजता राकेश त्याचे साहित्य सोबत घेऊन त्याच्या मालकीची होंडा सिटी कार घेऊन जोगेश्वरी मुंबई येथे जाण्याकरता बंगळुरू येथून रवाना झाला. पत्नीचा खून केल्यामुळे राकेशला टेन्शन आले होते त्याने महाराष्ट्रातील कागल या गावी आल्यावर एका मेडिकल दुकानामधून हार्पिक फिनाईल व झुरळ मारण्याचे औषध घेऊन कोल्हापूर, कराडच्या दिशेने प्रवास केला. 

इमारतीतील एकाला बॅगेत मृतदेह ठेवल्याची राकेशने दिली माहिती

दरम्यान, राकेशने बंगळुरू येथील इमारतीमधील खालचे मजल्यावर राहणाऱ्या इसमाला फोन करून पत्नीच्या खुनाबाबत व बॅगेत मृतदेह ठेवल्याची माहिती दिली. त्यानंतर पुढे खंडाळा घाट उतरल्यावर शिरवळ येथील निप्रो कंपनीजवळील हायवे रोडवर राकेश कार घेऊन आला. 

खुनाच्या तणावाखाली राकेश औषध पिला, मदतीसाठी एकाने रुग्णालयात आणला

त्याला केलेल्या खुनाचे टेन्शन आल्याने त्याने विकत घेतलेले सर्व कीटकनाशक व औषधे एकत्र करुन प्यायले. त्याचा त्याला त्रास होऊ लागल्याने राकेश कारमधून बाहेर येऊन रस्त्यावर बसला. राकेशला पाहून एका मोटरसायकल स्वाराने त्याची विचारपूस केली. त्यावेळी, आपण फिनाईल पिल्याचे सांगितल्याने दुचाकी स्वाराने त्याला तात्काळ त्याच्या कारमधून शिरवळ येथील जोगळेकर हॉस्पिटलमध्ये उपचारासाठी आणले. 

अखेर राकेशने पत्नीच्या खूनाबाबतचा सर्व प्रकार सांगितला

त्याठिकाणी अगोदरच हजर असलेले शिरवळ पोलीस स्टेशनचे पोलीस हवालदार कुंभार यांनी राकेशकडे काय झाले याबाबत विचारणा केली असता राकेशने त्याच्या पत्नीच्या खूनाबाबतचा प्रकार सांगितला. याबाबत शिरवळ पोलीस स्टेशनचे पोलीस निरीक्षक यशवंत नलावडे यांनी जोगळेकर हॉस्पिटलमधून आवश्यक माहिती घेऊन पोलीस अधीक्षक सातारा समीर शेख यांना ही माहिती दिली. पोलीस अधीक्षक यांनी तात्काळ बंगळुरू येथे संपर्क करून गौरीच्या खुनाबाबत खात्री केली. तसेच तेथील संबंधित वरिष्ठ अधिकारी पोलीस स्टेशन इन्चार्ज व इतर संबंधितांचे फोन नंबर पोलीस निरीक्षक नलावडे यांना पुरविले व पुढील तपासकामी सूचना दिल्या. 

पोलिसांनी बंगळुरू पोलिसांना दिली माहिती

अप्पर पोलीस अधीक्षक सातारा श्रीमती वैशाली कडूकर, पोलीस उपविभागीय अधिकारी फलटण राहुल धस यांना याबाबत माहिती दिली. वरिष्ठांच्या प्राप्त सूचनेनुसार पुढील कारवाई करुन राकेशचे नातेवाईक व बंगळुरू येथील पोलीस अधिकाऱ्यांची संपर्क करून त्यांना आरोपीबाबतची व उपचार बाबतची माहिती दिली. राकेशला अधिक उपचाराची गरज असल्याने त्याला तात्काळ पोलिसांनी भारतीय विद्यापीठ हॉस्पिटल व त्यानंतर ससून हॉस्पिटल पुणे येथे उपचाराकरता दाखल केले. बंगळुरू येथील संबंधित पोलीस ठाण्याचे अधिकारी आज पहाटे ससून हॉस्पिटल येथे पोहोचले असून त्यांनी आरोपीकडे विचारपूस सुरू केलेली आहे. आरोपीने पळून जाण्याच्या व विषारी कीटकनाशके पिऊन आत्महत्या करण्याचा प्रयत्न केला होता. परंतु, त्याला नागरिक व पोलिसांनी तात्काळ दवाखान्यात दाखल करून व त्यानंतर पुढील चांगले प्रकारचे उपचारासाठी पुणे येथे वरिष्ठांच्या मार्गदर्शनाप्रमाणे तात्काळ रवाना केले आहे.

दरम्यान, सदरची कामगिरी ही पोलीस अधीक्षक सातारा समीर शेख, अप्पर पोलीस अधीक्षक डॉ. वैशाली कडूकर, उपविभागीय पोलीस अधिकारी राहुल धस यांचे मार्गदर्शनाखाली शिरवळ पोलीस स्टेशनचे पोलीस निरीक्षक यशवंत कृष्णा नलावडे, पोलीस हवालदार कुंभार, नलावडे, धुमाळ, मोहरे पोलीस शिपाई दीपक पाले पवार व होमगार्ड या टीमने पार पाडली आहे.