दुर्दैवी! पाण्याची मोटार सुरू करताना विजेचा धक्क्याने ३६ वर्षीय युवकाचा मृत्यू; भोर तालुक्यातील कामथडी येथील घटना

नसरापूर : पुणे-सातारा महामार्गावरील कामथडी (ता. भोर) गावातील खुटवडवस्ती येथे पाण्याची मोटर चालू करताना विजेचा धक्का लागून ३६ वर्षीय युवकाचा मृत्यू झाल्याची दुर्दैवी घटना घडली आहे. राजेंद्र चंद्रकांत खुटवड असे मयत झालेल्या युवकाचे नाव आहे. ही घटना आज बुधवारी (दि. १४ मे) दुपारी घडली. याबाबत अशोक ज्ञानोबा खुटवड (वय ३६ वर्ष, दोघेही रा. खुटवड वस्ती, कामथडी, ता. भोर) यांनी राजगड पोलिसांना माहिती दिली.

पोलिसांनी दिलेल्या माहितीनुसार, कामथडी (ता. भोर) गावातील खुटवडवस्ती येथील राजेंद्र खुटवड हा युवक बुधवारी दुपारी अडीच वाजण्याच्या सुमारास आपल्या राहत्या घरा समोरील पाण्याची मोटार चालु करण्यासाठी गेला होता. परंतु मोटर चालू करताना विजेचा तीव्र धक्का लागल्याने हा युवक जागीच बेशुध्द पडला. यानंतर गावातील नातेवाईकांनी तातडीने त्याला नसरापूर येथील खासगी दवाखान्यात नेले. मात्र त्याचा उपचारादरम्यान दुपारी तीन वाजता मृत्यू झाला. घटनेची माहिती मिळताच राजगड पोलिसांनी मृतदेह ताब्यात घेऊन शवविच्छेदनासाठी भोर येथील उपजिल्हा रुग्णालयात पाठवला. सदर घटनेबाबतचा अधिक तपास राजगड पोलीस ठाण्याचे पोलीस निरीक्षक राजेश गवळी यांच्या मार्गदर्शनाखाली पोलिस हवालदार राणे करीत आहेत.