वरंध घाटात कारचा अपघात… कार चक्क ९० फूट खोल दरीत कोसळली…
भोर: भोर मार्गे महाडला जाणाऱ्या वरंध घाटात पुन्हा एकदा अपघात झाला आहे. अपघाताचे सत्र या रोडवर सुरूच असल्याचे दिसत आहे. या रोड वरून जाणाऱ्या प्रवाशांमध्ये यामुळे भीतीचे वातावरण निर्माण झाले आहे. काल बुधवार (दि.१८) रोजी दुपारी वरंध घाटात उंबर्डे गावाच्या हद्दीत कार ९० फूट खोल दरीत कोसळल्याची घटना घडली आहे.सुदैवाने गाडीत कोणीही प्रवाशी नसल्याने मोठा अनर्थ टळला आहे.
मिळालेल्या माहितीनुसार,भोर मार्गे महाडच्या दिशेने काही प्रवाशी कार घेऊन जात असताना वरंधा घाटातील उंबर्डे (ता.भोर) गावच्या हद्दीत गाडीतून धूर निघत असल्याचे चालकाच्या लक्षात आले असता चालकाने गाडी रस्त्याच्या बाजूला उभी करून गाडीतील चालकासह तिघे प्रवासी गाडीतून खाली उतरले. परंतू अचानक गाडी उताराने पुढे जाऊन दरीत कोसळली. सुदैवाने गाडीत कोणी नसल्याने अनर्थ टळला.मात्र यात गाडीचे मोठ्या प्रमाणात नुकसान झाले असल्याचे प्रथमदर्शी अक्षय धुमाळ यांनी सांगितले. या बाबत भोर पोलिस ठाण्यात अद्याप पर्यंत अपघाताबाबत कोणतेही नोंद करण्यात आली नसल्याचे भोर पोलीस स्टेशन कडून सांगण्यात आले.
