धक्कादायक! व्यायाम करताना भोलावडे येथील तरुणाचा मृत्यू

भोर : भोलावडे(ता. भोर) येथील पद्मावती हॉटेल समोर एका २१ वर्षीय तरुणाचा व्यायाम करत असताना मृत्यू झाल्याची घटना घडली आहे. अजय काळू भोसले(वय २१ वर्ष, रा. भोलावडे ता.भोर) असे मयत झालेल्या तरुणाचे नाव आहे. याबाबत संजय सुरेश भोसले(वय २५ वर्ष, रा. आंबेडकरनगर, भोलावडे ता. भोर) यांनी भोर पोलीस ठाण्यात खबर दिली आहे.

भोर पोलिसांनी दिलेल्या माहितीनुसार, खबर देणारे संजय भोसले आणि मयत अजय भोसले हे व्यायाम करण्यासाठी शुक्रवारी(दि. १९ एप्रिल) भोलावडे येथील पद्मावती हॉटेल समोर थांबले होते. त्यानंतर मयत अजयने सात-आठ जोर मारले व थोडा व्यायाम केला. आणि तो अचानक बेशुद्ध होऊन खाली पडला. त्यानंतर संजय याने लागलीच अजयच्या नातेवाईकांना कळवून त्यास भोर येथील हरजीवन हॉस्पिटल येथे उपचारासाठी आणले. तेथील डॉक्टरांनी अजयला तपासून भोर मधील सरकारी दवाखान्यात घेऊन जाण्यास सांगितले. तेथील डॉक्टरांनी त्यास तपासून तो उपचारपूर्वी मृत झाल्याचे घोषित केले असल्याचे फिर्यादीत म्हटले आहे. भोर पोलीस ठाण्यात शुक्रवारी रात्री उशिरा या मृत्यू बाबतची नोंद करण्यात आली असून सदर घटनेचा पुढील तपास पोलीस अंमलदार भोसले मॅडम करीत आहेत.