सारोळ्यातील निरा नदीपात्रालागत पोत्यात आढळला तरुणाचा हात पाय बांधलेल्या अवस्थेतला मृतदेह
सारोळा : पुणे-सातारा महामार्गावरील सारोळा(ता.भोर) गावच्या हद्दीतील हॉटेल नानांची वाडी लगतच्या निरा नदीपात्रात अंदाजे ३५ ते ४० वयोगटातील पुरुष जातीचा मृतदेह आज रविवारी(दि. ९ मार्च) सकाळच्या सुमारास आढळून आल्याने एकच खळबळ उडाली आहे. या तरुणाचा मृतदेह पोत्यात आढळला असून त्याचे हात पाय बांधलेल्या अवस्थेत होते. त्यामुळे हा घातपात असल्याचे दिसून येत आहे.
घटनेची माहिती मिळताच राजगड पोलीस ठाण्याचे पोलीस निरीक्षक राजेश गवळी, पोलीस उपनिरीक्षक वृषाली देसाई, पोलीस उपनिरीक्षक अजित पाटील, पोलीस हवालदार मयूर निंबाळकर, अक्षय नलावडे, नाना मदने, नरुटे, कोंढाळकर यांनी घटनास्थळी धाव घेत मृतदेह ताब्यात घेऊन शवविच्छेदनासाठी भोर येथील उपविभागीय रुग्णालयात पाठवला आहे.
मृतदेहाच्या गळ्यावर व्रण असून उजव्या हातावर “ओम” कोरले आहे. ३५-४० वयोगटातील कोणी व्यक्ती बेपत्ता असल्यास संपर्क करण्याचे आवाहन राजगड पोलिसांनी केले आहे. सदर घटनेबाबत अधिक तपास राजगड पोलीस करीत आहेत.
