कुरुंगवडीत घराला आग, नंतर सिलेंडरचाही स्फोट; जळीतग्रस्त शेतकऱ्याचे लाखो रुपयांचे नुकसान
भोर : राजगड(वेल्हे) तालुक्याच्या हद्दीवर असलेल्या कुरुंगवडी(ता.भोर) येथे आज मंगळवारी(दि. ४ जून) एका घराला अचानक आग लागली. लागलेल्या आगीत पूर्ण घर संसार जळून खाक झाला असून तंटामुक्ती अध्यक्ष संदीप संपत शिळीमकर यांचे हे घर असून त्यांचे लाखो रुपयांचे नुकसान झाले आहे.
कुरुंगवडी येथील एका शेतकरी कुटुंबाच्या राहत्या घराला अचानक आग लागली. आग विझवण्यासाठी ग्रामस्थ, तरुणांनी शर्तीचे प्रयत्न केले. मात्र आगिने रुद्र रूप धारण केल्याने आगीत घरातील धान्य, कपडे, जनावरांचा चारा तसेच घरातील महागाई वस्तू जळून खाक झाल्या. काही वेळाने गॅस सिलेंडरचा स्फोट झाला. मात्र नशीब बलवत्तर म्हणून घरातील एकही व्यक्ती दगावली नसून घरात बांधलेली जनावरे बचावली.
अचानक लागलेल्या आगीत घरातील वस्तू जळत असतानाच काही वेळातच सिलेंडरचा स्फोट झाल्याने घराच्या भिंतींना मोठमोठे तडे गेले असल्याने जळीतग्रस्त शेतकऱ्याचे मोठे नुकसान झाले असल्याची माहिती मिळाली आहे.
