विशाळगड प्रकरणी संभाजीराजे छत्रपती यांच्यासह ५० ते ६० जणांविरोधात गुन्हा दाखल; काय आहे संपूर्ण प्रकरण?

कोल्हापूर : विशाळगड परिसरात तोडफोड प्रकरणी संभाजीराजे छत्रपती यांच्यासह ५० ते ६० जणांवर यांच्यावर गुन्हा दाखल करण्यात आला आहे. बेकायदेशीर जमाव जमवणे, शासकीय कामात अडथळा, बंदी आदेशाचे उल्लंघन, सार्वजनिक मालमत्तेचे नुकसान या प्रकरणी गुन्हा दाखल झाला आहे.या प्रकरणी पोलिसांनी ५०० हून अधिक शिवप्रेमींवर गुन्हे दाखल केले आहे. तर शाहूवाडी पोलिसांकडून संभाजीराजे छत्रपती हे शाहूवाडी पोलीस ठाण्यात हजर झाले.

संभाजीराजे छत्रपती यांच्या नेतृत्वाखाली विशाळगडावर अतिक्रमण मुक्ती मोहीम रविवारी राबविण्यात आली. मात्र काही वेळानंतर या मोहिमेला हिंसक वळण लागण्याचं पाहायला मिळालं. संभाजी राजे छत्रपती यांच्यावर आज गुन्हा दाखल झाल्याची माहिती मिळत आहे. काल विशाळगड परिसरात दगडफेक आणि तोडफोड झालेल्या घटनेमुळे कार्यकर्ते आक्रमक झाल्याचं पाहायला मिळालंलं होतं. शाहूवाडी पोलीस ठाण्यात हा गुन्हा दाखल करण्यात आला आहे.

संभाजीराजे छत्रपती यांनी काय दिली प्रतिक्रिया?
विशाळगडावर रविवारी जी घटना घडली त्याला सरकार, जिल्हा प्रशासन जबाबदार असल्याचा आरोप करतानाच मी गेल्या दीड वर्षापासून अतिक्रमण काढा म्हणून मागे लागला होतो, त्याची दखल घेतली नाही. शिवभक्तांचा उद्रेक झाल्यानंतर तुम्ही अतिक्रमण काढण्याचे आदेश देत आहेत. मग यापूर्वी ते काढण्यावर कोणाचा दबाव होता? असा सवाल माजी खासदार संभाजीराजे यांनी उपस्थित केला.

संभाजीराजे यांनी पालकमंत्री हसन मुश्रीफ यांना फटकारले
पालकमंत्री हसन मुश्रीफ यांनी माझ्या पुरोगामीत्वावर संशय घेतला. त्यांनी मला पुरोगामीत्व शिकविण्याचा प्रयत्न करु नये, अशा शब्दात संभाजीराजे यांनी मुश्रीफ यांना फटकारले आहे. पालकमंत्र्यांनी बेजबाबदारपणे बोलू नये. माझ्या पुरोगामीत्वावर बोलण्याचा त्यांना अधिकार नाही. माझा जन्मच छत्रपती शाहू महाराजांच्या घराण्यात झाला आहे. मुश्रीफांनी त्यांच्या पोरानं पैशाचं काय केले, कारवाईला घाबरुन पक्ष बदललले यावर बोलावे, असे संभाजीराजे म्हणाले.

आंदोलनात उशिरा उतरलो याची खंत
विशाळगडावरील अतिक्रमणाचा विषय सरकारने गांभीर्याने घेतला नाही. शिवभक्त मोठ्या संख्येने येणार आहेत हे माहित असतानाही जिल्हा प्रशासनाने यंत्रणा का लावली नाही? तुम्ही अतिक्रमण का काढले नाही. मला त्या ठिकाणी का पोहचू दिले असे सवाल करत संभाजीराजे यांनी जिल्हा प्रशासनालाही झोडपले. विशाळगडावरील अतिक्रमणाबाबत मला उशीरा कळले. आंदोलनात उशीरा उतरलो. सहा वर्ष खासदार होतो, पण त्यावेळी मी तिकडे गेलो नाही याची मला खंत वाटते, असे संभाजीराजे म्हणाले.

जर्मन बेकरी बॉम्बस्फोट प्रकरणातील अतिरेक्याचे गडावर वास्तव्य
पुण्यातील जर्मन बेकरीत झालेल्या बॉम्बस्फोट प्रकरणातील मुख्य आरोपी यासीन भटकळ विशाळगडावर येऊन वास्तव्य केले, त्याच्या नोंदी आहेत. त्यावेळी पालकमंत्री महाशय कोठे होते? त्यावेळी त्यांचे पुरोगामीत्व कोठे गेले होते? असा सवाल संभाजीराजे यांनी उपस्थित केला. विशाळगडावरील अतिक्रमणाला कोणाचा पाठिंबा होता, प्रशासनावर कोणाचा दबाव होता हे लपून राहिलेले नाही. म्हणून काल जी दंगल घडली त्याच्या खोलात निश्चितपणे जावे, असेही ते म्हणाले.

संभाजीराजेंची हतबलता
सर्वच सरकारांवर संभाजीराजे यांनी हल्लाबोल केला असून त्यांनी फसवणूक केल्याचा आरोप केला. गडकोट किल्ल्यांना ४५० कोटी रुपये देण्याची घोषणा करण्यात आली. मात्र काही घडले नाही. सर्वच गडावरील अतिक्रमणाला आतापर्यंत आलेली सरकारे जबाबदार आहेत. रायगडावरील विकास कामात एक टक्का कमिशन खाऊ दिले नाही. प्रामाणिकपणे काम करत आहे. गडकोट किल्ल्यांसाठी मी लढतो हे नको असेल तर मला सांगा. मी थांबतो. मला सगळ्या गोष्टींचा त्रास होऊ लागला आहे. गडकोटांकडे पाहण्याच्या दृष्टीकोनातून मी त्रासून गेलो आहे. अशा उद्वीग्न भावनाही त्यांनी व्यक्त केल्या.