नसरापूर येथील २८ वर्षीय तरुणाचा दुर्दैवी मृत्यू; परिसरात शोककळा
नसरापूर : पुणे-सातारा महामार्गावरील नसरापूर(ता. भोर) येथे एका २८ वर्षीय तरुणाचा दुर्दैवी मृत्यू झाल्याची घटना आज रविवारी (दि. ४ मे) साडे बारा वाजण्याच्या सुमारास घडली. अक्षय देविदास रिंगे असे मयत झालेल्या तरुणाचे नाव आहे. याबाबत हर्षल देविदास रिंगे (वय २६ वर्ष, दोघेही रा. स्वामी समर्थ नगर, नसरापूर) याने राजगड पोलिसांना खबर दिली. त्यानंतर राजगड पोलीस ठाण्यात आकस्मित मृत्यूची नोंद करण्यात आली आहे. हृदयविकाराच्या तीव्र धक्क्याने हा मृत्यू झाला असल्याचा प्राथमिक अंदाज वर्तविला जात आहे.
मिळालेल्या माहितीनुसार, मयत अक्षय रिंगे हा आपल्या राहत्या घरी दुपारच्या वेळेस झोपला होता. झोपेतून उठताना तो चक्कर येऊन खाली पडला. त्यांनतर घरातील व शेजारच्या व्यक्तींनी अक्षयला त्वरित उपचारासाठी नसरापूर येथील सिद्धीविनायक हॉस्पिटल येथे आणले. परंतु डॉक्टरांनी त्यास उपचारापूर्वीच मयत घोषित केले. एक उमदा तरुण गेल्याने परिसरात हळहळ व्यक्त केली जात आहे. याबाबतचा अधिक तपास राजगड पोलीस करत आहेत.