मुळशीत भरधाव टेम्पोनं अनेकांना चिरडलं, अपघातात सहा प्रवासी गंभीर जखमी
मुळशी : अपघातांच्या घटनेचा सपाटा काही संपता संपेना. रोज कुठे ना कुठे अपघात घडत असल्याच्या घटना समोर येत असतात. एकापेक्षा एक भीषण अपघाताच्या घटना समोर येत असतात.
अशातच मुळशीतील पुरंगुड घाटात अपघात झाल्याचं समोर आलंय. भरधाव टेम्पोची अनेक वाहनांना धडक दिली. या घटनेचा थरारक सीसीटीव्ही व्हिडीओही समोर आलाय.
मुळशी तालुक्यातील कोलाड पुणे महामार्गावर पिरंगुट घाटात भीषण अपघात झालाय. तीव्र उतारावर एका मालवाहतूक करणाऱ्या टेम्पो चालकाचा वाहनावरील ताबा सुटल्यानं त्याने अनेक वाहनांना उडविले. यातील प्रवासी गंभीर जखमी झालेत. त्यांच्यावर खासगी रुग्णालयात उपचार सुरू आहे.
मालवाहू टेम्पोचा ताबा सुटून पाच दुचाकी आणि एका कार धडकून हा टेम्पो चालक फरार झाला असून हा थरार सीसीटीव्हीत कैद झालाय. या अपघातात सहा प्रवासी गंभीर जखमी झाले आहेत. या घटनेनं परिसरात एकच खळबळ उडवली आहे.
दरम्यान, पिरंगुट घाटात अवजड वाहनांच्या अपघातांची मालिकाच सूर असून स्थानिक प्रशासन त्याकडे दुर्लक्ष करत आहे. उतारावर अपघात रोखण्यासाठी कोणत्याच उपाययोजना प्रशासन करत नसल्याने, दर आठवड्यात इथे भयंकर अपघात होत असतो. त्यामुळे मुळशीतील नागरिक आक्रमक झाले असून पुणे जिल्हाधिकारी डॉ. राजेंद्र देशमुख यांनी त्वरित पाहणी करून तातडीने उपाययोजना अंमलात आणाव्यात अशी मागणी होत आहे.
