भोर येथील सभेत गर्दीचा फायदा घेत चोरी करणारे चोरटे जेरबंद

भोर : मराठा आरक्षणाच्या पार्श्वभूमीवर रविवार (दि.१९) रोजी मनोज जरांगे पाटील यांच्या सभेचे आयोजन करण्यात आले होते. या सभेच्या गर्दीचा फायदा घेत अज्ञात चोरट्याने ३५ हजार रुपयांची रोख रक्कम तर एक मोबाईलची जबरी चोरी केल्याचे घटना घडल्याची फिर्याद भोर पोलिसात बळवंत दादासाहेब नेवसे (वय ६८ वर्षे) रा. पिराचामळा (भोर) व दीपक लक्ष्मण शेटे (वय ४२ वर्षे) चौपाटी (भोर) यांनी दिली.

भोर पोलिसांनी दिलेल्या माहितीनुसार अज्ञात चोरट्याने चौपाटी येथून गर्दीचा फायदा घेत दीपक शेटे यांच्या खिशातून ३५ हजार रुपये रोख रक्कम चोरी केली होती. तर जरांगे पाटील यांची सभा संपल्यानंतर अनंतराव थोपटे महाविद्यालयाच्या समोरील रस्त्यावरून मोबाईलवर बोलत घरी जात असताना चोरट्याने ओप्पो कंपनीचा लाल रंगाचा मोबाईल हिसकावून धूम ठोकली. याची तक्रार भोर पोलिसात दिली असता भोर पोलिसांनी तात्काळ सापळा रचून चोरटा ज्ञानोबा पिराजी सुमुखराव (वय ३८) रा.राजुनगर बाबुळगाव ता.लातूर यास अटक करून जेरबंद केले. पुढील तपास पोलीस निरीक्षक शंकर पाटील यांच्या मार्गदर्शनाखाली उपनिरीक्षक श्रीकांत जाधव व पोलीस अंमलदार धर्मवीर खांडे करीत आहेत.